سٺي حڪمراني ۽ ايڪتا ذريعي ئي مسئلا حل ٿي سگهن ٿا ڪاوش ۽ ڪي ٽي اين جو سرواڻ علي قاضي

ڪاوش ۽ ڪي ٽي اين نيوز جي سرواڻ علي قاضي چيو آهي ته ايندڙ نسل کي خوشحال سنڌ ڏيڻ لاءِ ايڪتا ۽ ٻڌي ڪرڻي پوندي، سٺي حڪمراني ۽ ايڪتا ذريعي ئي مسئلا حل ڪري سگهجن ٿا.

گهوٽڪي ۾ ڪي ٽي اين نيوز ۽ ڪاوش جي سرواڻ علي قاضي جو شهرين پاران گلن جي ورکا سان شاندار آڌرڀاءُ ڪيو ويو.

قادر پور روڊ تي شهرين پاران ڏنل آجياڻي واري تقريب کي خطاب ڪندي علي قاضي چيو ته، مان اهو پيغام کڻي نڪتو آهيان ته سنڌ کي برادرين جي نالن ۾ ورهائڻ بدران ايڪتا جو مظاهرو ڪرڻ گهرجي.

علي قاضي چيو ته، سنڌ اندر صنعتي علائقن ۾ مقامي ماڻهن کي روزگار ملي سگهي ٿو، پر سمورن مسئلن جو حل ٻڌي ۽ ايڪتا ۾ ئي آهي، سندس چوڻ هو ته، جهڙي ريت سمورا سنڌي 7 ڊسمبر تي ايڪتا جي لـَڙِي ۾ پوئجي ويندي، ائين ئي ايڪتا سان پنهنجا مسئلا حل ڪري سگهجن ٿا.

تقريب کي تبديلي پسند اشفاق ميمڻ، محبوب علي سومرو، جمال شاهه ۽ الاهي بخش گهوٽو پڻ خطاب ڪيو.

ان کان اڳ ڪي ٽي اين نيوز ۽ ڪاوش جي سرواڻ علي قاضي جو قافلو ميرپور ماٿيلي کان گذري رهيو هو ته، شهرين پاران سندس شاندار آڌر ڀاءُ ڪيو ويو، ان کانسواءِ گهوٽڪي جي سرحد شهر ۾ به شهرين پاران علي قاضي جي ڀرپور نموني آجيان ڪئي وئي.

سرحد شهر ۾ شهرين پاران ڏنل آجياڻي کي خطاب ڪندي علي قاضي چيو ته، نياڻين سميت سڀني کي برابري جي بنياد تي تعليم ملڻ گهرجي.

هن چيو ته احتجاجي مظاهرن کان اڳ حڪومت کي ماڻهن جا مسئلا حل ڪرڻ گهرجن، اسان سڀني کي ڀوتارڪي نظام جي خوف مان نڪرڻو پوندو.

علي قاضي چيو ته سنڌ ۾ روڊ رستن جي حالت انتهائي خراب آهي، جنهن سبب حادثا پيش اچن ٿا ۽ ڪلاڪن جا ڪلاڪ ٽريفڪ معطل رهي ٿي.

ڪاوش ۽ ڪي ٽي اين نيوز جي سرواڻ وڌيڪ چيو ته سنڌ ۾ برادرين جي نالي تي خون ٿيندا آهن، لکين سنڌ واسي هيپاٽائيٽس ۾ مبتلا آهن پر سڀني مسئلن جو حل سٺي حڪمراني، ايڪتا ۽ ٻڌي ۾ ئي آهي.

پنهنجو رايو هتي ڏيو

Your e-mail address will not be published.
Required fields are marked*