تعليم واري وزير ڄام مهتاب ڏهر سنڌ ۾ تعليم جو معيار ٻين صوبن جي ڀيٽ ۾ گهٽ هئڻ جو اعتراف ڪندي چيو آهي

jam mehtab

تعليم واري وزير ڄام مهتاب ڏهر سنڌ ۾ تعليم جو معيار ٻين صوبن جي ڀيٽ ۾ گهٽ هئڻ جو اعتراف ڪندي چيو آهي ته امتحانن دوران ڪاپي روڪڻ ۾ ناڪاميءَ جا ذميوار اسان سڀ آهيون، جيستائين سڀ گڏجي ڪم نه ڪنداسين ڪاپي ختم نه ٿيندي، صوبائي وزير  سرڪاري ڪاليجز ۾ پڙهندڙ شاگردن جي فيس معاف ڪرڻ جو اعلان پڻ ڪيو.

ڪراچي ۾ تربيتي سيمينار کي خطاب ڪندي ڄام مهتاب ڏهر ٻين صوبن جي ڀيٽ ۾ سنڌ ۾ تعليم معيارگهٽ هجڻ  جواعتراف ڪندي چيو ته صوبي جا سرڪاري ادارا گهربل نتيجا ڏيڻ ۾ ناڪام ويا آهن.

صوبائي وزير چيو ته امتحانن دوران ڪاپي روڪڻ ۾ ناڪاميءَ جا ذميوار اسان سڀ آهيون، جيستائين سڀ گڏجي ڪم نه ڪنداسين ڪاپي ختم نه ٿيندي.

هن چيو ته آصف زرداري به امتحانن ۾ ڪاپي روڪڻ بابت پڇيو، پر مون وٽ ان سوال جو ڪو به جواب نه هو ڇوته اسان سڀ ان ۾ ملوث آهيون.

ڄام مهتاب ڏهر  چيو ته آئنده جنهن امتحاني مرڪز تي ڪاپي ٿيڻ جي شڪايت ملي ته اتان جي ايڪسٽرنل ۽ انٽرنل کي ٻيهر ڊيوٽي نه ڏني ويندي، جڏهن ته غير تدريسي عملي جون امتحاني ڊيوٽيون لڳائڻ تي پابندي هنئي وئي آهي.

صوبائي وزير صوبي جي سرڪاري ڪاليجز ۾ پڙهندڙ شاگردن جي فيس معاف ڪرڻ جو اعلان ڪندي چيو ته في شاگرد تي امتحاني فيس سميت ساليانو 16 هزار رپيا خرچ اچي ٿو، جيڪو سنڌ حڪومت پاڻ ڀريندي.

پنهنجو رايو هتي ڏيو

Your e-mail address will not be published.
Required fields are marked*