وزيراعظم نوازشريف چيو آهي ته الزامن جي سياست ڪندڙن کي عوام سڃاڻي ورتو آهي، مخالف الزام هڻن  پر  اسان ڪم ڪندا رهنداسين، اکيون بند ڪري ويٺل ڪبوتر کي 2018 ۾ شينهن کڻي ويندو.

 آزاد ڪشمير ۾ نيلم جهلم پاور پلانٽ جي افتتاحي تقريب کي خطاب ڪندي وزيراعظم چيو ته اجايا احتجاج ڪرڻ مخالفن جي عادت بڻجي وئي آهي ۽  اهي ماڻهو روز ٽي وي تي اچي گاريون ڏيندا آهن.

وزير اعظم چيو ته سڀني کي  خبر آهي ته ملڪ کي ڪنهن تباهه ڪيو آهي ، الزام هڻندڙ عادتن کان مجبور، مخالف الزام هڻن  پر  اسان ڪم ڪندا رهنداسين.

وزير اعظم چيو ته لوڊشيڊنگ ۾ مبتلا ڪرڻ وارن کي ماڻهو سڃاڻين ٿا ۽ اسان چونڊن کان اڳ واعدو ڪيو هو ته اقتدار ۾ اچي 5 سالن  دوران  لوڊشيڊنگ جو مڪمل خاتمو آڻينداسين.

هن چيو ته جڏهن 2013 ۾ اسان اقتدار سنڀاليو ته پاڪستان   ڊفالٽ قرار ڏيڻ جي ويجهو هو، ماضي ۾ لوڊشيڊنگ عروج تي پهتل هئي، اسان ان کي ڪنهن حد تائين ختم ڪري ڇڏيو آهي.

نواز شريف چيو ته مخالف ياد رکن 2018 ۾ به شير ڪاميابي ماڻي حڪومت ۾ ايندو  ۽ شير  اکيون بند ڪري ويٺل ڪبوتر کي کڻي ويندو.

هن چيو ته ايندڙ سال وڌيڪ 10 هزار ميگاواٽ بجلي سسٽم ۾ شامل ٿي ويندي ۽ اسان جي ڪنهن  به ميگا منصوبي ۾ ڪرپشن جو الزام ناهي لڳو.

وزير اعظم چيو ته  اسان نئين پاڪستان جي تعمير ڪري رهيا آهيون ۽ روز نوان نوان ڪوڙ ڳالهائيندڙن مان عوام بيزار ٿي ويو آهي.